Er nad yw cystal â chael cangen o’ch gwasanaeth banc gerllaw, mae Canolfannau Bancio yn ei gwneud hi’n haws i chi fancio wyneb yn wyneb, pwy bynnag yw eich banc. Maen nhw ar gael mewn cymunedau ledled y DU. Mae rhai yn cael eu gweithredu gan Swyddfa’r Post a rhai gan Cash Access UK, a phob un mewn partneriaeth â darparwyr mawr ar y stryd fawr.

Mae’r Canolfannau’n cynnig gwasanaeth cownter, lle gall cwsmeriaid unrhyw fanc wneud trafodion bancio rheolaidd fel talu gydag arian parod a sieciau, codi arian, gwirio balans, talu biliau cyfleustodau, neu ychwanegu at nwy neu drydan. Mae mannau preifat hefyd lle gall cwsmeriaid siarad â bancwyr cymunedol o’u banc eu hunain am faterion mwy cymhleth sy’n gofyn am breifatrwydd. Mae’r banciau’n gweithio ar sail cylchdroi, felly bydd staff o wahanol fanciau ar gael ar wahanol ddiwrnodau. Dim ond un Ganolfan Bancio sydd yng ngogledd Cymru ar hyn o bryd, wedi’i rhedeg gan Swyddfa’r Post, a hynny yn 35 Stryd Fawr, Prestatyn (rhif ffôn 01745 770 751). Ond mae Cash Access UK wedi cadarnhau eu bod yn agor Canolfan yn Abergele ddechrau 2024, yn dilyn cais gan Darren Millar, AS Gorllewin Clwyd.

Mae llawer o leoliadau cymeradwy ar gyfer Canolfannau Bancio wedi cael eu creu oherwydd bod cymunedau wedi gofyn amdanynt. Os ydych chi’n meddwl y byddai eich ardal leol yn elwa ar un hefyd, gallwch wneud cais i LINK. Gall unrhyw un ofyn am adolygiad o fynediad eu cymuned at arian gan LINK, gan gynnwys aelodau o’r cyhoedd, swyddogion etholedig a grwpiau cymunedol.

LINK yw rhwydwaith peiriannau arian parod mwyaf y DU, sy’n cysylltu bron pob un o beiriannau codi arian y DU ac yn sicrhau bod cymunedau’n gallu cael gafael ar yr arian sydd ei angen arnynt. LINK yw’r unig ffordd y gall banciau a chymdeithasau adeiladu gynnig arian parod i’w cwsmeriaid ledled y DU. Mae holl brif ddarparwyr cardiau peiriannau codi arian a debyd y DU yn aelodau o LINK.